RANGE ROVER: ИСТОРИЈАТ

Минатата година Range Rover стана првото возило со системот Контрола на движењето по секаков терен (ATPC), иновативен систем на Land Rover - прва технологија во светот дизајнирана за да ги подобри способностите за теренско возење преку автоматско одржување на извонредно малата брзина за ползење преку пречките што му овозможува на возачот да се фокусира на управувањето.

Појавувањето на третата генерација на Range Rover донесе значајни подобрувања во однос на претходната генерација во сите елементи. Поголема и попространа, внатрешноста беше инспирирана од дизајнерските детали во јахтите од високата класа, луксузниот мебел и авионските седишта од првата класа. Резултатот беше возило со внатрешност којашто беше една од најлуксузните во светот.

Втората генерција на Range Rover или P38a - името го доби затоа што беше развиена во зградата 38А во фабриката во Солихал во Обединетото Кралство - на пазарот се појави во 1994 година и донесе уште полуксузна внатрешност, поголеми способности за друмско и теренско возење во однос на претходната генерација. Главните дизајнерски карактеристики ја прават втората генерација веднаш препознатлива како Range Rover. Легендарната силуета, лебдечкиот покрив, едноделната хауба поставена на шарки, практичната деллива крајна врата и непрекинатата странична линија траат до денешен ден.

Приказната за Range Rover започна во седумдесетите кога Land Rover сакаше да внесе револуција во растечкиот пазар за 4х4 возила со првиот луксузен SUV во тоа време. Моделот од првата генерација, познат и како класик модел и оригинално достапен само во изведбата со две врати, се појави на пазарот во 1970 година и се карактеризираше со V8 алуминиумски мотор со мала тежина, постојан погон на четири тркала и диск кочници на сите тркала. Во текот на 25-годишниот животен век се претставија бројни варијанти и надградби, како додавањето на моделот со четири врати во 1981 година и автоматскиот менувач во 1982 година.

Оригиналниот Range Rover од 1970 година ги комбинираше одличната друмска управливост и префинетост со бескомпромисната способност за движење по секаков терен. Генерациите што доаѓаа го одржуваа неговиот статус на врвот на пазарот на луксузни SUV возила во поглед на способноста и привлечноста. Во 1972 година Range Rover стана првото возило што ја заврши експедицијата Транс Америка со должина од 29.000km. Експедицијата беше организирана од страна на британската армија и во неа беше вклучено и опасното преминување преку Дариенскиот расцеп во Јужна Америка.

Range Rover имаше репутација на ненадмината способност за движење по секаков терен и таа репутације беше зацементирана преку бројни тестови на издржливост од високо ниво. Постигањето со преминување преку Дариенскиот расцеп го следеше успешното минување на епската патека преку пустината Сахара во должина од 12.000 км за 100 дена.

Во 1977 година Range Rover го зацементира својата репутација на способност со победата на маратонот Лондон - Сиднеј во должина од 30.200km во класата 4х4.

Range Rover победи на првото рели Париз - Дакар во 1979 година, а потоа следеше уште една победа во 1981 година. Потоа, во 1985 година, Range Rover „Bullet“ (куршум) со дизел мотор собори 27 брзински рекорди со што се докажа сестраноста на Range Rover.

Три возила Range Rover Hybrid ја завршија експедицијата на издржливост во должина од 16.000km долж древниот пат на свилата, од Обединетото Кралство до Индија по копно.